السي عباس، هل تعلم أن شابا خامسا من ضحايا النجاة انتحر قبل أيام؟
** شكون ﮔـالها ليك؟
- علاه ما قريتيهاش فالصحافة؟
** أنا ما كنقراش شي جريدة أخرى من غير جريدة الحزب ديالي.
- وعلاش؟
ما نخبيش عليك أخويا، كاينين شي جرائد ما نقدرش نقرا فيهم سطر واحد، حيت عندهم قدرة عجيبة باش يطلعو ليا السكر حتى يفوت عشرين ﮔـرام!
- هاكداك …
** المشكل هو أنكم كاتعرفو جميع أنني ما بيدي حتى شي سلطة، ومع ذلك هاد الصحافيين الله يهديهم ﮔـاع المشاكل اللي كاتوقع فهاد البلاد كايلصقوها فيا غير أنا. حشومة والله يلا حشومة!
- آجي بعدا، ديك الفضيحة ديال النجاة شكون اللي مسؤول عليها بالضبط؟
** كاينين بزاف، ماشي غير أنا بوحدي! ولكن كما قلت لك سابقا، فين ما وقعات شي مصيبة كايلصقوها ليا غير أنا حيت عارفيني ما نقدرش نـﮕـول حتى آح!
- ولكن كون صدقات القضية غادي تحسبها لراسك بوحدك، ولا لا؟
** طبعا، هذا مؤكد! حنا السياسيين كانبغيو نتشاركو غير فالخسارة، ولكن مللي كايكون شي نجاح ما تعرفني ما نعرفك.
- كاينين بعدا شي نجاحات فهاد الحكومة ديالك آسي عباس ولا والو؟
** معلوم! أكبر نجاح بالنسبة ليا هو أن يعيش المغاربة على إيقاع كل هذه المشاكل ومع ذلك الشعب مْـكالمي مع راسو، بحال يلا الناس كايفطرو بالبنج! كاين شي نجاح اكتر من هذا؟ أنا براسي والله يلا طاح ليا العجب! وهذه مناسبة باش نـﮕـول بأن المغاربة هم أكبر شعب صبور على وجه الأرض!
- شفت الهضرة ديالك آسي عباس تبدلات شوية هاد ليام…
** إيوا راك عارف، ملي كاتقرب الانتخابات الواحد كايلوح الجلد ديالو الحقيقي ويبدلو بشي جلد مزور، حتى تفوت الانتخابات وديك الساعة يرجع بنادم للأصل ديالو! اللي كايدير السياسة فالمغرب خاصو يكون بحال الحرباء، واللي بغا يبقى دوريجين بلا شك غادي يهزو الما!
- باقي عاقل على داك التصريح ديال سيدي إفني؟
** باقي عاقل عليه، ومللي كانتفكرو كانضحك بوحدي حيت درتها ﮔـد راسي! ولكن خاصك تعرف بلي أنا ما عليا والو، اللي كاين وهو أنهم ﮔـالو ليا ﮔـول ما كاين والو، وانا نـﮕـولها، هذا ما ما كان، ونبينا عليه السلام.
- والصحة آش خبارها، ﮔـالو ليا عييتي شوية …
** أخويا خمسة على عينيك. أنا هاد الساعة أون فّـورم، ويلا شكّـيتي يا الله أنا وياك نضربوها بشي جرية. عنداك تديرها بصح، راه غير كانزعت وصافي، حيت الواحد مللي كاتمشي الصحة كايبقا فيه غير اللسان! ولكن مع الأسف هاد اللسان حتى هو كايخوي بيا مللي كانحتاج ليه، بعض المرات كايـﮕـول ليا راسي نحك معاه شي فلفلة سودانية باش ترجع ليه شوية ديال الحرورية! ولكن كايـﮕـول ليا واحد الراس آخر بلي ما كاين ما احسن الواحد يطوي لسانو ويتصنت لعضامو.
- في الختام بغينا نعرفو العلاقة ديالك مع السي اليازغي آش اخبارها حتى هي؟
أنا والسي اليازغي ليس بيننا إلا الخير والإحسان، وشوية ديال العداوة الأخوية!
